राष्ट्रिय प्रजातन्त्र पार्टी (राप्रपा)का नेता एवं रुपन्देही क्षेत्र न–३ का प्रतिनिधि सभामा निर्वाचित सदस्य दीपक बोहराको निधन भएको छ।
विगत लामो समयदेखि स्वास्थ्य समस्याबाट ग्रसित बोहराको मंगलबार काठमाडौँको ओम अस्पतालमा उपचारका क्रममा ७४ बर्षको उमेरमा निधन भएको हो।
बोहरा पोस्ट कोभिड समस्याले गर्दा अहिले बोल्न नसक्ने अवस्थामा पुगेका थिए।
उपचारका लागि दिल्ली पुगेका बोहरालाई चिकित्सकहरूले पोष्ट कोभिडका कारणले घाँटीमा समस्या भएको जनाएको थियो। थप समस्या थपिएपछि उनी अमेरिकाको न्यूयोर्क समेत पुगेर उपचार गरि फकिएका थिए। त्यसयता उनी स्पीच थेरापी गर्दै आएका थिए।
गत आम निर्वाचतनमा रुपन्देही निर्वाचन क्षेत्र नम्बर ३ मा राप्रपाको उम्मेदवारका रुपमा मैदानमा उत्रिएका बोहोराले निर्वाचन प्रचारप्रसारका क्रममा कुनै पनि सभा, सम्मेलन वा घरदैलोमा सम्बोधन नगरी आफ्ना सहयोगीमार्फत प्रचार गर्दै र नमस्कारकै भरमा कांग्रेसका नेता बालकृष्ण खाडलाई पराजित गर्दै सदस्यमा निर्वाचित भएका थिए।
विगतमा राष्ट्रिय पञ्चायतमा पटक पटक निर्वाचित हुँदै सहायक, राज्य र मन्त्रीसम्म र बहुदलीय प्रजातान्त्रिक व्यवस्थासँगै संघीय लोकतान्त्रिक गणतन्त्र कालमा पनि पटक पटक निर्वाचित सदस्य र मन्त्री बन्दा सदन र सडकदेखि मन्त्रिपरिषदमा सक्रिय र आक्रामक शैलीमा प्रस्तुत हुनसक्ने नेता बोहोरा पछिल्लो पटक भने स्वास्थ्यका कारण कुनै पनि दिन एक शब्द नबोली सांसदबाट विदा भए।
बोहराको निधन भएपछि राप्रपा, राप्रपा नेपाल लगाएत दलका नेताहरु अस्पताल पुगेर श्रद्धाञ्जली अर्पण गरेका थिए। उनीहरुले बोहरासंगको सहकार्यका साथै नेपालको राजनीतिमा बोहराको योगदानको स्मरण गरेका थिए।
दीपक बोहराको जन्म बि.स २००७ चैत १८ मा भएको थियो। रुपन्देही–३ को २०७९ सालको प्रतिनिधिसभा निर्वाचनमा बोहोराले तत्कालीन नेपाल सरकारका गृहमन्त्री नेपाली कांग्रेसका नेता बालकृष्ण खाँणलाई पराजित गरेका थिए।
स्वर्गीय बोहराको अन्त्येष्टि बुधबार उनकै गृहजिल्ला रुपन्देहीमा गरिने राप्रपाले जनाएको छ।
