काठमाडौँ महानगरपालिकाका प्रमुख प्रशासकीय अधिकृत सरोज गुरागाईँ कार्यालय पुगेर हाजिर गरेका छन्।
बिहीबार तनावकाबीच प्रमुख प्रशासकीय अधिकृत गुरागाईँले महानगर पुगेर हाजिर गरेको हुन्।
महानगरपालिका प्रमुख बालेन्द्र साहसँगको तिब्रमतभेदका कारण विगत लामो समयदेखि प्रशासकीय अधिकृतबिहिन अवस्थामा रहेको महानगरपालिकामा सामान्य प्रशासन मन्त्रालयले गुरागाईँलाई नै कार्यभार सम्हाल्न भनेपछि बिहिबार उनी बलजफती नै कार्यालय प्रवेश गरी हाजिर गरेका हुन्।
महानगर प्रमुखको निर्देशनमा महानगरीय प्रहरीले उनको कार्यालयमा प्रवेश रोक लगाउन उनको कार्यकक्षबाहिर ताला लगाएर अवरोध सृजना गर्न कोशिश गरेपनि महानगरपालिका उपप्रमुखसहित केही वडाअध्यक्षको सहयोगमा उनी प्रवेश गर्न सफल भए।
गुरागाईँलाई कार्यालय प्रवेशमा रोक लगाउने प्रयास भएपछि उपप्रमुख सुनिता डंगोल, बिभिन्न वडाका वडाध्यक्षका साथै कर्मचारीहरुले कार्यकक्षमा पुराएका थिए।
कार्यकक्ष पुग्दा ताला नखोलेपछि ढोका फोडेर गुरागाईँलाई हाजिर गराइएको थियो।
हाजिर गरेपछि सबैलाई धन्यवाद दिदै गुरागाईँ फर्किएका छन्।
महानगरका प्रवक्ता नवीन मानन्धरले पुष ८ गतदेखि प्रमुख प्रशासकीयबिहीन भएको अवस्था बिहिबार आएर अन्त्य भएको बताए।
उनले प्रमुख प्रशासकीय अधिकृत गुरागाईँले हाजिर गरेसंगै आगामी दिनमा सहज रुपमा सेवा प्रदान हुने र कर्मचारीका समस्या समेत समाधान हुने विश्वास व्यक्त गरे।
काठमाडौंको भ्यु टावर निर्माणका बिषयमा गुरागाईँलाई महानगरले निलम्वन गरेको थियो। संघीय मामिला तथा सामान्य प्रशासन मन्त्रालयले गुरागाईंलाई महानगरपालिकामै हाजिर गर्ने वातावरण बनाइदिन आग्रह गरेपछि उनी बिहीबार महानगर पुगेका थिए।
