नेपाल राष्ट बैंकका गर्भनर महाप्रसाद अधिकारीले आफ्नो कार्यकालमा राष्ट्र बैंकको स्वयत्ततामाथिको हस्तक्षेपका बाबजूद पनि सफल रहेको दाबी गरेका छन्।
शुक्रबार राष्ट्रबैंकमा आयोजित कार्यक्रममा आफ्नो ५ वर्षे कार्याकालको समिक्षा गर्दे राष्ट्र बैंकको स्वयतत्तामा हस्तक्षेप हुँदापनि विभिन्न समस्यासंग जुध्दै सफलतापुर्वक कार्य सम्पादन गरेको गर्भनर अधिकारीले बताए।
उनले नेपालको बाह्य क्षेत्र चालु आर्थिक वर्षको सात महिनामा अत्यन्त सबल बन्दै गइरहेको दाबी गर्दै चालु खातामा १६७ अर्बले बचतमा रहेको जानकारी दिए।
यसैगरी सोधनान्तर बचत २८४ अर्ब रहेको भन्दै विदेशी विनिमय दर बृद्धि हुँदै गएको जानकारी पनि उनले दिए।
चैत १५ गतेसम्मको तथ्यांकका आधारमा गभर्नर अधिकारीले यस अवधिमा १८ अर्ब ५३ करोड अमेरिकी डलर सञ्चिती पुगेको उनले बताए।
उनले २०७९ वैशाखमा ६.५५ महिनाको कभरेजमा झरेको देशको आयात क्षमता बृद्धि भएर अहिले १४ महिना भन्दा बढीको समयमा वस्तु तथा सेवा धान्नसक्ने स्थितिमा रहेको बताए।
पछिल्लो समय बैंकिङ क्षेत्रमा पनि पर्याप्त मात्रामा तरलता रहेको उल्लेख गर्दै यसबाट व्याजदरमा समेत कमि आएको जानकारी उनले दिए।
राष्ट्र बैंकले गत मंसिरदेखि बैंकहरुको व्याजदर ८.५५ प्रतिशतको औसतमा कायम गराएको दाबी गर्दै चालु आर्थिक वर्षको सुरुदेखि चैत २१ गतेसम्मको मितिमा बैंकहरुले कुल ३ सय ७ अर्ब निक्षेप संकलन गरी ३१५ अर्ब कर्जा प्रवाह गरेको बताए।
तत्कालीन सरकारले २०७६ चैत २४ गते ५ वर्षे कार्यकालका लागि राष्ट्र बैंकको गभर्नरमा नियुक्त भएका अधिकारीलाई त्यहीबिचमा बदलीएको सरकार र त्यसका मन्त्रीले उनको कार्यशैली र राजनीतिक रुपमा कुनै पार्टी विशेषको संलग्नताबाट रुष्ट भई पदमुक्त गर्ने प्रयास गरेपनि उनलाई अदालतले पुनर्बहाली गरिदिएको थियो।
सामाजिक संजालमा एम अधिकारी नामको व्यक्तिलाई नेकपा एमालेको विभागीय सदस्यका रुपमा रहेको समाचार सार्वजनिक भएपछि उनको विषयमा चर्को आलोचना पनि भएको थियो।
यसका बाबजूद पदमा रहेर आफ्नो कार्यकाल समाप्त गरी विदा हुन लागेका गभर्नर अधिकारीले वित्तीय पहँुच वृद्धि गर्ने तथा भुक्तानी प्रणालीको आधुनिकिकरण गर्ने कार्यमा समेत उल्लेखनिय उपलब्धीहरु हाँसिल भएको बताए।
गर्भनर अधिकारीले नेपालको मुल्य तथा बाह्य क्षेत्र स्थायित्व गर्ने, वित्तिय प्रणाली प्रति सर्वसाधारणको बिश्वास अभिवृद्धि गर्ने जस्ता जिम्मेवारी पुरा गर्न बैकले मौद्रिकनीति, नियामकीय नीतिहरु तर्जुमा गरेको जानकारी दिए।
उनले वित्तीय स्थायीत्व कायम गर्नका लागि बैंकले विभिन्न अन्तर्राष्ट्रिय असल अभ्यासहरु अवलम्वन गर्दे वित्तीय सस्थाहरुको नियमन तथा सुपरिवेक्षणलाई प्रभावकारी बनाउदै लगेको उल्लेख गरे।
गर्भनर अधिकारीले आफ्नो कार्यकालमा कार्य सम्पादनका लागि सहयोग पुर्याउने सबैप्रति धन्यवाद समेत व्यक्त गरे।
अधिकारीको बहिर्गमन पश्चात रिक्त हुन लागेको गभर्नर पदका लागि सरकारले नियुक्तिको प्रक्रिया सुरु गरिसकेपनि अहिलेसम्म नयाँ गभर्नरको आधिकारिक नाम टुंग्याउन बाँकी नै छ।
