प्रतिनिधि सभा अन्तर्गको राज्य व्यवस्था तथा सुशासन समितिले चैत्र १५ गते तीनकुनेमा भएको घटनाका दोषीहरु उपर छानविन गरि कानूनी कारवाही गर्न सरकारलाई निर्देशन दिएको छ।
सिंहदरबारमा शुक्रबार बसेको समितिको बैठकले राजावादीहरुले विरोध प्रदर्शनका नाममा घटाएको हिंसात्मक घटनाको भत्र्सना गर्दै दोषीहरु उपर आवश्यक छानविन गरि कानूनी कारवाही अघि बढाउन सरकारलाई निर्देशन दिएको हो।
बैठकले तीनकुने र आसपासको स्थानमा आगामी दिनमा कुनै पनि प्रकारका सभा, विरोध प्रदर्शन, धर्ना लगाएतका कुनै कार्यक्रमका लागि अनुमति नदिन समेत सरकारलाई निर्देशन दिएको छ।
त्यस्तै आगामी दिनमा यस्ता खालका हिंसात्मक घटनाहरु दोहरिनबाट रोक्न एवं मुलुकको व्यवस्था रक्षाका लागि गम्भीरताका साथ अघि बढ्न सरकारलाई निर्देशन दिइएको समिति सभापति रामहरि खतिवडाले जानकारी दिए।
उनले नेपाल प्रहरी र सशस्त्र प्रहरी बललाई साधन स्रोत सम्पन्न बनाउन आवश्यक बजेटको लागि व्यवस्थापन गर्न समेत सरकारलाई निर्देशन दिइएको बताए।
बैठकमा गृहमन्त्री रमेश लेखकले चैत्र १५ गते भएको घटनाका दोषीलाई कारवाही हुने स्पष्ट पारे।
उनले आगामी दिनमा यस प्रकार गैरजिम्मेवार, अराजक र उद्दण्डतापूर्ण गतिविधि हुन नदिन सरकार गम्भीर रहेको बताए।
संविधानलाई हिंसात्मक गतिविधिबाट उल्टाउने नियतकासाथ चैत्र १५ गतको घटना भएको भन्दै उनले सबै सचेत हुन जरुरी रहेको धारणा राखे।
विगतमा जनताले लामो संघर्ष, बलिदान र त्याग गरेर प्राप्त गरेको संघीय लोकतान्त्रिक गणतन्त्रात्मक संविधालाई हिस्सात्मक गतिविधिका माध्यमबाट उल्ट्याएर फेरि मुलुकमा निरंकुशता लाद्न गरिने गैरराजनीतिक गतिविधिलाई सरकारले निस्तेज पार्ने बचनबद्धता पनि व्यक्त गरे।
उनले सबैलाई संविधान, कानून बमोजिम सबैले आफ्ना मौलिक अधिकार उपभोग गर्न पाउने सवालमा सरकारले कुनै व्यवधान खडा नगर्ने तर, संविधान र व्यवस्थामाथि नै धावाबोल्दै गरिने हिंसात्मक गतिविधलाई नसहने बताए।
उक्त घटनामा प्रहरीतर्फ ५५ जना, सशस्त्र प्रहरी बलतर्फ २५ जना र प्रदर्शनकारीतर्फ ५४ जना घाइते भएको जानकारी पनि उनले गराए।
बैठकमा समिति सदस्यहरुले चैत्र १५ गतेको घटनामा पूर्वराजा ज्ञानेन्द्र शाहको भूमिकाका बिषयमा छानविन गर्नुपर्ने धारणा राखेका थिए।
