प्रधानमन्त्री केपी शर्मा ओली र भारतका प्रधानमन्त्री नरेन्द्र मोदीबीच भेटवार्ता भएको छ।
शुक्रबार बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिम्स्टेक)को छैटौँ शिखर सम्मेलन सकिएपछि थाइल्याण्डको राजधानी बैङ्ककमा नेपाल र भारतका प्रधानमन्त्रीबिच भेटवार्ता भएको हो।
भेटवार्तामा संस्कृति, धर्म र जनता–जनता सम्बन्धमा आधारित नेपाल र भारतबीचको पुरानो सम्बन्धलाई सुदृढ पार्ने बिषयमा कुराकानी भएको बताइएको छ।
त्यस्तै व्यापार, सीमापार सम्पर्क, ऊर्जा साझेदारी र विकास परियोजनाहरूसहित द्विपक्षीय सहयोग सम्बन्धी विभिन्न मुद्दाहरूमा छलफल भएको पनि बताइएको छ।
गत वर्षको असारमा तत्कालीन प्रधानमन्त्री पुष्पकमल दाहाल नेतृत्वको सरकारलाई विस्थापित गर्दै साउनको सुरुमै नेपाली कांग्रेससँगको सहकार्यमा सरकारको नेतृत्व सम्हाल्न पुगेका प्रधानमन्त्री ओलीको भारतीय प्रधानमन्त्री मोदीसँगको भेटमा उनले भारतीय समकक्षीलाई जेठमा हुन लागेको सगरमाथा सम्मलेनमा सहभागी हुन निम्ता समेत दिएको बताइएको छ।
सरकारको नेतृत्व लिएलगत्तै भारत भ्रमणको लागि औपचारिक निमन्त्रणाको पर्खाइमा रहेका प्रधानमन्त्री ओलीलाई उक्त भेटका अवसरमा भ्रमणको निम्तो दिए, नदिएको केही जानकारी बाहिर आएको भने छैन।
त्यसअघि शुक्रबार नै प्रधानमन्त्री ओलीले बिम्स्टेकको छैटौँ शिखर सम्मेलनलाई सम्बोधन गरेका थिए।
सो क्रममा उनले बिम्स्टेकले परिवर्तनशील समयलाई मात्र नभई हाम्रो क्षेत्रीय सहयोगलाई पुनःजीवित गर्ने अवसरलाई सदुपयोग गर्नुपर्नेमा जोड दिएका थिए।
जलवायु परिवर्तनले सम्पूर्ण मानवजातिको अस्तित्वमा सङ्कट सृजना गरेको उल्लेख गर्दै उहाँले हिमालयहरू एसियाका लागि पानीका स्रोत भएको बताएका थिए।
यसैबीच बिम्स्टेकको छैटौँ शिखर सम्मेलनले समृद्धि, लचिलोपन र खुलापनको नाराअन्तर्गत बिम्स्टेक बैङ्कक भिजनसहित छ बुँदे प्रस्ताव पारित गरेको छ।
