नेपाल विद्युत् प्राधिकरणका पूर्व कार्यकारी निर्देशक कुलमान घिसिङले विद्युत्को बक्यौता महसुल उठाउन खोजेपछि आफुलाई सरकारले पदबाट हटाइएको आरोप लगाएका छन्।
शुक्रबार पत्रकार सम्मेलन गर्दै घिसिङले विद्युत् महसुल बक्यौता उठाउन खोजेपछि आफुलाई ६ पटक स्पष्टीकरण सोधिएको र सोहि कारण नै आफुलाई पदबाट हटाइएको बताए।
सार्वजनिक संस्थाको बक्यौता उठाउन खोज्ने मेरो प्रयास राज्यविरुद्धको अपराध हो? भन्दै उनले यसको जवाफ इतिहास र नेपाली जनताले अवश्य माग्ने बताए।
नेपाल विद्युत प्राधिकरणका निवर्तमान कार्यकारी निर्देशक घिसिङ र सरकारका उर्जामन्त्री दपक खढ्कासँगै प्रधानमन्त्री केपी शर्मा ओलीबिच तिब्र मतभेद भएपछि उनलाई मन्त्रालयले सुरुमा र पछि मन्त्रिपरिषदले नै स्पष्टिकरण माग गर्दै चित्तबुझ्दो स्पष्टिकरण नआएको र अनुशासनहिन कार्य गरेको आरोपमा पदमुक्त गरेको थियो।
आफूलाई पदमुक्त गरी रिक्त स्थानमा पूर्व कार्यकारी निर्देशक हितेन्द्रदेव शाक्यलाई नियुक्त गरेलगत्तै घिसिङले सर्वोच्च अदालतमा सरकारको निर्णय बदरको माग गर्दै रिट निवदेन दर्ता गराएका थिए। त्यसका अतिरिक्त चार वर्षअघि आफूलाई सरकारले पदमुक्त गरी घिसिङलाई नियुक्त गरेको आरोपमा अदालतमा रिट दायर गरेपनि मुद्दाको किनारा नलागी चार वर्षे कार्यकाल विताएका शाक्यले पनि सर्वोच्च अदालतमा रिट दायर गराएका थिए।
उनीहरु दुबैको निवेदनमाथि विगत तीन दिनदेखि सर्वोच्च अदालतमा भएको बहस र प्रतिउत्तर पश्चात न्यायाधीशद्वय कुमार चुडाल र नित्यानन्द पाण्डेयको संयुक्त इजलासले बिहिबार घिसिङको माग बमोजिम अन्तरिम आदेश जारी गर्न अस्विकार गर्दै शाक्यलाई काम गर्न बाटो खोलिदिएको थियो।
अदालतले पुनर्बहालीका लागि आदेश नदिएपछि शुक्रबार घिसिङले पक्रकार सम्मेलन गर्दै विधुत व्यापारमा सक्रिय रहदा वर्तमान ऊर्जामन्त्री आएपछि अनावश्यक दवाव सिर्जना गर्न खोजेको आरोप लगाए।
राष्ट्रसेवक कर्मचारीलाई हतोत्साहित एवं अपमानित गराउने दुराशय सफल भएकोमा कतिपय व्यक्ति, समूह वा शक्तिले आफूलाई सफल ठानेपनि नेपाली जनताले दिएको स्नेह र आशीर्वादले आफुलाई हार्न नदिएको उनको दाबी छ।
घिसिङले आगामी दिनमा देश र जनताको सेवामा समर्पित रहिरहने जिकिर गरे।
त्यस्तै उनले आफ्नो कार्यकालमा भएका कामहरुको जानकारी गराउदै कामका दौरान चौतर्फी रुपमा प्रयास भएको बताए।
आगामी दिनमा पनि आफुमाथि हुने प्रहारप्रति आफु सहज रहेको बताउँदै उनले अगामी दिनमा देश र जनताको हितका लागि जुनसुकै जिम्मेवारी लिन पनि आफु तयार रहेको बताए।
नेकपा माओवादी केन्द्रका अध्यक्ष पुष्पकमल दाहाल लगायतका नेताहरुसँगको निकटतका कारण कतिपयले उनलाई माओवादी पार्टीको चुनावी राजनीतिमा सहभागी हुनसक्ने अड्कलबाजी पनि गर्न थालेका छन्। तर, यसबारे उनले अहिले नै मुख भने खोलिसकेका छैनन्।
