इंग्लिस प्रिमियर लिगमा जोसे मौरिन्होको टोटनह्यामले म्यान्चेस्टर युनाइटेडमाथि ६–१ को फराकिलो जीत हात पारेको छ । म्यान्चेस्टर युनाइटेड मौरिन्होको पूर्व क्लब हो । खेलको २८ औंं मिनेटमा एन्थोनी मार्सियाल सिधै रातो कार्ड पाएर मैदानबाट बाहिरिएपछि १० खेलाडीमा सीमित भएको म्यानचेस्टर युनाइटेडविरुद्ध ह्यारी केन र ह्युङ मिन सनले दुई–दुई गोल गरे भने एनडोम्बेले र औरिएरले एक–एक गोल गरे । दोस्रो मिनेटमै पाएको पेनाल्टीमा ब्रुनो फेर्नान्डेसले गोल गर्दै म्यानचेस्टर युनाइटेडलाई सुरुवाति अग्रता दिलाएका थिए । तर, एनडोम्बेलेले चौथो मिनेटमा टोटनह्यामका लागि बराबरी गोल गरे । सनले सात र ३७ औं मिनेटमा गोल गर्दा केनले ३० र ७९ औं मिनेटमा गोल गरे । औरिएरले ५१ औं मिनेटमा गोल गरेपछि टोटनह्यामले फराकिलो जित हात पारेको हो । चार खेलबाट सात अंक जोडेको टोटनह्याम छैटौं स्थानमा उक्लिएको छ । तीन खेलबाट तीन अंक जोडेको म्यानचेस्टर युनाइटेड १६ औँ स्थानमा छ । लिग अन्तर्गत गएराति नै भएका अन्य खेलमा साउथह्याम्पटनले वेष्ट ब्रोमलाई २–०, आर्सनलले शेफिल्ड युनाइटेडलाई २–१ तथा वुल्भ्सले फुलह्यामलाई १–० ले पराजित गरेका छन् ।