इंग्लिस क्लब म्यानचेस्टर युनाइटेडले उरुग्वेका स्ट्राइकर एडिन्सन काभानीलाई क्लबमा अनुबन्धित गरेको छ । खेलाडी ट्रान्सफरको अन्तिम दिन युनाइटेडले काभानीलाई फ्रि–ट्रान्सफरमा अनुबन्धित गरेको हो । फ्रेन्च क्लब पेरिस सेन्ट जर्मेन (पीएसजी) का पूर्व स्ट्राइकर काभानीले युनाइटेडसँग एक वर्षको सम्झौता गरेका छन् । ३३ वर्षीय काभानीले गत जुनको अन्त्यसँगै पीएसजी छाडेका थिए । उनले क्लब फुटबलमा ५ सय ५६ खेलमा ३ सय ४१ गोल गरेका छन् । पीएसजीका लागि उनले ३ सय १ खेल खेल्दै २ सय गोल गरेका छन् । उरुग्वेका लागि उनले १ सय १६ खेलमा ५० गोल गरेका छन् ।