उपत्यका लकडाउन वा सील गर्ने कुनै सम्भावना छैन: सिसिएमसी
कोरोना नियन्त्रण र रोकथामका लागि सरकारले गठन गरेको कोभिड १९ संकट व्यवस्थापन केन्द्र निर्देशक समितिले संक्रमण न्युन भएका स्थानमा यसअघि बन्द भएका सेवाहरु सूचारु गर्न प्रस्ताव गरेको छ ।
सिंहदरबारमा मंगलबार बसेको सिसिएमसी बैठकले कोरोनालाई मध्यनजर गर्दै यसअघि बन्द गरिएका सेवाहरु कोरोना संक्रमण न्युन हुदै गएको स्थानमा खुल्ला गर्नका लागि मन्त्रिपरिषद्मा प्रस्ताव लैजाने निर्णय गरेको हो ।
बैठकले कोरोना जाोखिम उच्च देखिएका स्थानको पहिचान गरि निश्चित क्षेत्रमा आवश्यकता अनुसार सिल गरि परिक्षणको व्यवस्था मिलाउने निर्णय पनि गरेको छ । त्यस्तै बैठकले अन्तराष्ट्रिय उडानहरु नियमित भएका अलावा अन्य देशहरुबाट पनि आवश्यकता अनुसार थप उडान गर्न मन्त्रिपरिषद्मा प्रस्ताव लैजाने निर्णय गरेको प्रधानमन्त्री तथा मन्त्रिपरिषद् कार्यालयका सचिव महेन्द्र गुरागाईंले जानकारी दिए ।
बैठकले केहि सेवा कार्यालयमा कार्यरत कर्मचारीलाई कोरोना संक्रमण भए सेवा प्रवाह नै बन्द गरिने गरेकोमा अव संक्रमित कर्मचारीलाई आइशोलेट गरेर बाँकी कर्मचारीबाट सेवा प्रवाहलाई निरन्तरता दिने निर्णय भएको उनले बताए ।
त्यस्तै काठमाडौं उपत्यकामा एकीकृत एम्वुलेन्स सेवाको पार्किङको समस्या देखिएकाले त्यसको व्यवस्थापन सम्बन्धीत नगरले नै गर्नेगरि निर्णय गरिएको गुरागाईले जानकारी दिए ।
बैठकमा उपत्यकामा कोरोना संक्रमणको अवस्थाका बारेमा पनि छलफल भएको थियो । बैठकले उपत्यकामा परिक्षणको दायरा बढाउने निर्णय गरेको छ भने मेयर फोरमको सुझाव दिएअनुसार उपत्यकामा लकडाउन वा सील गर्ने कुनै सम्भावना नरहेको गुरागाँइले जानकारी दिए ।
त्यस्तै बैठकमा नेपालभर कोरोना संक्रमणको अवस्था तथा रोकथाम र नियन्त्रणका लागि भएका प्रयासका बारेमा छलफल भएको थियो ।
प्रकाशित मिति: सोमबार, मंसिर ८, २०७७
प्रतिक्रिया दिनुहोस्
थप समाचार
साताको लोकप्रीय
