काठमाडौं – प्रिमियर लिग क्लब म्यान्चेस्टर सिटीले बेनिफिकाका डिफेन्डर रुबेन डायसलाई अनुबन्ध गरेको छ । बुधबार बिहान सिटीले डिफेन्डरलाई ६ वर्षका लागि टिममा अनुबन्ध गरेको जनाएको हो । २३ वर्षीय याडसका लागि सिटीले ६५ मिलियन पाउण्ड खर्च गरेको छ । सिटीका प्रशिक्षक पेप ग्वार्डिओलाले यो सिजनमा डायससहित तीन जना खेलाडीलाई टिममा अनुबन्ध गरेका हुन् । यसअघि उनले डिफेन्डरमा नाथन आके र फरवार्डमा फेरान टोरेसलाई अनुबन्ध गरेका थिए । सिटीसँग आवद्ध भएपछि डायसले आफूले क्लबलाई पछि पर्न नदिने बताएका छन् । ‘म्यान्चेस्टर सिटी जस्तो क्लबमा आवद्ध हुने अवसर पाएकोमा उत्साहित छु । मैले क्लबलाई पछि पर्न दिनेछैन,’ डायसले भनेका छन् । राम्रो टीम र विश्व स्तरका प्रशिक्षकसँग खेल्न पाउनु आफ्ना लागि भाग्यको कुरा भएको उनले बताएका छन् । पोर्चुगलका राष्ट्रिय टोलीका खेलाडी डायसले बेनिफिकाको एकेडेमीबाट आएका खेलाडी हुन् । उनले बेनिफिकाका लागि १ सय १३ खेल खेलेका छन् ।