गत बिहीबारदेखि बेपत्ता भएका रुपन्देहीका एक सिनियर अहेबको शव फेला परेको छ । बिहीबार बुटवलबाट घर तर्फ जान हिँडेका मोतीपुर प्राथमिक स्वास्थ्य केन्द्रका सिनियर अहेब विष्णुप्रसाद नेपाल बिहीबारदेखि बेपत्ता भएका थिए । इलाका प्रहरी कार्यालय बुटवलका प्रहरी नायव उपरीक्षक प्रदीप सिंह राठौरले बेपत्ता नेपालको शव तिलोत्तमा नगरपालिका १६ छत्तिस मौजा कुलोको बेहुलीमा भेटिएको बताए । बुटवल बसपार्कमा रहेको होटल पार्क प्लाजाबाट घर जान हिँडेका उनी परिवारको सम्पर्कमा नभएपछि खोजी गरिदिन प्रहरीमा निवेदन परेको थियो । होटलबाट निस्केका नेपालको बुटवल उपमहानगरपालिका–६ स्थित नहरको छेउमा उनी सवार मोटरसाईकल भेटिएका थियो । नहरमा पानी बाहव उच्च भएकाले नहरमा गएको हुन सक्ने आशंकामा प्रहरीले नहरमा खोजी गर्दा नेपालको शव भेटिएको उनले बताए । लु २० प ४०६७ नं. को मोटरसाइकल नहरमा भेटिएकाले नहरमा पानी रोकेर प्रहरीले खोजी तीव्र बनाएको थियो । शुुद्धोधन गाउँपालिका–४ का ४४ वर्षीय नेपाल सोही ठाउँमा रहेको भावना मेडिकल हलका सञ्चालक समेत हुन् ।